giovedì 21 aprile 2011

Region geographic de Italia
per Francesco Galizia 
Quando on parla de region geographic, non besonia confunder le region geographic, a vices denominate con un adjectivo que on refere ad un nation o ad un populo, con le Stato, e le Nation. Le region geographic es delimitate ab confinios phisic que son representate ab le costas marin, ab le curso del fluvios e ab le catenas montuose . Le grande insulas e le archipelagos son regiones geographic: on pensa in Europa al Grande Britannia, al Irlanda o al Islanda. Anque le grande peninsulas, quando illos son delimitate e separate ab le area continental ab catenas montuose, son recognoscite. On pote citar in Europa le peninsulas iberic e italian. Totevia, le confinios phisic son frequentemente incerte, o del toto absente, al contrario, le confinios statal son ben definite. Le Stato es, de facto, un entitate juridic-politic que ha soveranitate sur un territorio con confinios certe. Al base del Stato on ha le presentia conjuncte de tres elementos fundamental: le population, le territorio e le soveranitate. Le Nation es un union de gente que ha in commun varie elementos como: origine, lingua, cultura, ethnia, religion, racia, identitate, historia e que habita ab seculos in un determinate territorio. 

Le region geographic italian es un region del Europa meridional delimitate a nord ab le catena del Alpes. Situate inter le peninsula iberic e le peninsula balkanic, illo se bania in le Mar Mediterranee et in particular in le Mar Ligure, le Mar Tyrrhen, le Mar Ionie et le Mar Adriatic. Le region geographic italian in le su conformation traditional ha un superficie de circa 324.000 km², superior a cello del Republica italian (poco plus de 301.000 km²), proque in le region son continite anque territorios que face parte del Francia, Suissa, Slovenia e Croatia e que in illo son includite anque quatro parve Statos independente.

Etymologia

Le toponimo “Italia” esseva usate per le prime vice ab le autores grec e latin, como Strabon et Herodoto. Con tal nomine on indicava le parte meridional del peninsula,le antique Bruttium habitate ab le Italos, ab Italo, le rege de Enotria, (actual Calabria), secundo quanto transmittite anque ab Dionigi de Alicarnasso, Tucidides e Vergilio, pois le nomine era extendite pro indicar le habitantes del Magne Grecia, que esseva clamate Italiòtai. Le etymologia del nomine, on basa sur le nomine grec Italos, que significa tauro, como forma contracte e grecisate del umbro vitlu (vitello). Tal etymologia era state jam transmittite ab le mesme grecos que videva le origine del nomine in Ouitoulìa ( alias le "terra del vitellos") ab le vocabulo "Italòi", termino con le qual le grecos designava le Vitulos, un population que habitava le terras a sud del isthmo del Bruttium, e que adorava le simulacro de un vitello. Le nomine significava ergo "habitantes del terra del vitellos". Tal populo habeva assumite le proprie nomine ab le legendari rege Italo, assi que le zona precedentemente appelate Ausonia habeva prendite le nove nomine de "Italia" . Secundo Aristoteles le Italos assi clamate in honor del rege Italo, qui habeva transformate le populo de Enotria, ab nomades como illes era, in agricultores, e habeva date a illes nove leges. De facto usque le initio del V seculo a. C., con le nomine Italia on indicava tote le actual region de Calabria, pois tote le peninsula e, ab le 49 a.C., quando al Gallia Cisalpin era concedite le derecto de citatano roman, anque al regiones septentrional del peninsula. Le confinios esseva ulteriormente extendite con le reforma administrative del Imperator Augusto (27 a.C.), illos iva a west usque al fluvio Varo presso le citate de Nicea (Nizza) e al est usque le fluvio Arsa, in Istria. Secundo un altere hypothese le origine del nomine non es un forma grecisate del umbro, tamen un termino de derivation etrusc.In cello lingua existeva de facto le termino italos, que indicava le tauro, probabilemente derivate ab *vitalu, con cadita del digamma. Iste termino era usate ab le Etruscos pro indicar le populos italic del Italia centro-meridional. Altere sustene que le termino Italia sia derivate ab le grec Aithàle, nomine usate pro indicar le insula de Elba, transformate pois in Aitlìa, Eitalìale, Etalìa, Italìa. Aithàle in grec significa fumose, et haberea indicate le presentia de furnaces pro laborar le metallos. O, le termino se refereva al vulcanos presente in le Italia del sud (Etna, Vesuvio e le insulas Eolias) : in iste caso Aithàleia era le "terra que fuma".

Puntcos extreme del region geographic

Le punctos extreme del region italic, mensurate respecto al Meridian de Greenwich son:
a septentrion le Vetta de Italia in le Alpes Aurin a 47° 05' 29" Nord;
a meridion le Capo Sud del scolio de Filfola in le insulas maltese, a 35° 47' 05"Sud;
a oriente Capo de Otranto in Apulia, a 18° 31' 13" longitudine Est.
a occidente le Monte Chardonnet in le Alpes Coties, a 6° 32' 52" West.
Le distantia orthodromic N-S es de 1.269 km.

Division geographic

Quando on parla de region italian se refere generalmente al territorio, que va ab le Alpes usque al Calabria. Illo es dividite in tres parte: continental, peninsular e insular.

Parte continental

Le parte continental, in le qual es includite le Istria, corresponde a circa le 40% del region italian et es situate al nord de un linea que va ab le ore del fluvio Magra a cello del fluvio Rubicon usque al Alpes. Illo contine le bassinos hydrographic del fluvios Po e Atesio.

Parte peninsular

Le peninsula italian o italic, face parte del continente europee transversate ab le catena montaniose del Appeninos e delimitate ab quatro mares: le Ligure, le Thyrren, le Ionie e le Adriatic. Es un del tres peninsolas del Europa del Sud con le Iberic e Balkanic. Le peninsula comencia ab le Appeninos tosco-emilian, e se extende usque al puncta meridional de Capo Spartivento in Calabria, con un amplitude de circa 1.000 km in direction Nordwest - Sudest. Le peninsula corresponde a circa le 42% del region italian.

Parte insular

Le parte insular se extende sur un superficie de circa 60.000 km² (le18% circa de tote le region italian), de cuje 58.000 km² circa per le Sicilia, le Sardinia e le Corsica. Ultra iste grande insulas, se trova longe le costas numerose insulas minor e archipelagos. Le lista monstra le plus grande insulas del region geographic italian, in parenthese le superficie:
Sicilia ( 25.460), Sardinia (23.813), Corsica (8.681), Veglia (409), Cherso (406), Malta (246), Elba (223), Sancte Antioco (109), Pantelleria (83), Lussino (74), Gozo (67), Sancte Petro (51,5), Asinara (50,9), Ischia (46,7), Lipari (37,3), Salina (26,4).
 Limites geographic
Le analyse del limites natural del region italian, signate ab le catena alpin e ab le mare, revela confinios que, in complexo, son inter le plus clar e minus discutite del nostre continente. Le unic incertitude reguarda le confinios oriental, ubi traditionalmente on indica le Alpes Julie e le Gulfo del Carnaro ( de cuje refere anque Dante), ma on ha un hypothese, que contemplarea le continuation del Alpes Julie, a transverso le montes Bittorai, usque le catenas del montes Velebites e le Alpes Dinaric e que includerea anque le Dalmatia in le region geographic italic. Al interno de iste on ha varie confinios historic, como le ordine regional de Augusto del Italia roman, le limes administrative longe le fluvio Arsa signava le fin del “Regio X Venetia et Histria”. Dunque, ad est, nonobstante le character del orographia in le region a sud del Passo de Nauporto, le continuitate del bastion montan es assecurate ab le montes inter le Monte Pomario e le Monte Nivose, ubi isto attinge le Gulfo del Carnaro e le Baia de Buccari, a Sud-Est del urbe de Fiume. Le insulas de Cherso, Lussino, Veglia e le alteres insulas minor vicin, son includite in le region geographic italian in quanto le insulas del Carnaro son le natural continuation del Istria e son plus vicin al costas istrian que a celle dalmatic. Al west, le confinio es representate ab le Alpes maritime que, distaccate ab le Monte Clapier divide le bassino del fluvio Roia ab cello del fluvio Varo e attinge assi le costa a Sud-West de Nizza.

Geographia politic

Le Republica italian occupa le 93% del region geographic italic. Le restante parve portion (20.800 km²) es dividite inter alteres statos. Son integremente includite in le limite del region geographiic italian: Le Principato de Monaco, le Republica de San Marino, le Republica de Malta, e le Citate del Vaticano. In ultra son includite in le region geographic italian varie zonas de altere statos:
  • in le Confederation Helvetic:
le Val Divedro in le canton Vallese, le integre canton Ticino, e in le canton Grisones le Valle Mesolcina, le Val Bregaglia, le Val Poschiavo e le Val Monastero;
  • in le Republica de Croatia: le Istria, le archipelago de Pelagosa e le tres insulas de Cherso, Lussino e Veglia, cedite depost le Tractato de Pace del 10 februario 1947.
  • in le Republica Francese:
le Corsica, le contea de Nizza e le territorios cedite con le Tractato de Paris del 1947, (Briga e Tenda, le colle del Monginevro, le monte Chaberton e le zona del Colle del Moncenisio);
  • in le Republica Italian:
le quasi totalitate del territorio es in le Region geographic italian, excludite 3 vallatas alpin que son tributari del Rheno e del Danubio e le insulas Pelagias que appertine al platteforma continental african.
  • In le Republica de Slovenia:
le Alpes Julie e le litoral de Capodistria.

Historia

Antiquitate

Le idea del Italia como region geographic es multo antique e remonta al I seculo a. C. De facto, le plus vetule tractato de geographia que es pervenite a nos es cello de Strabon(65/64 - 25/21 a.C.), le geographo grec scribeva un “Geographia” in grec antique: Γεωγραφικά – Gheographikà) in 17 volumines.
In le introduction del su libro V, Strabon da le su definition de Italia:
«Le Italia actual comencia al pedes del Alpes: [dice le Italia actual], proque iste nomine indicava al initio solmente le antique Ouitoulía, alias le pais situate inter le stricte de Sicilia e le gulfos de Taranto e de Posidonia; ma, habente prendite con le tempore un certe predomination, iste nomine ha finite per extender se usque al catena del Alpes, imbraciava anque, ab un parte, le Liguria usque al Varo e, ab le altere parte, tote le Istria usque a Pola.»
(Strabon - Geographia – Libro V – Capitulo I : Le Transpadania e le Cispadania)
In le libros V e VI del su Geôgraphiká , Strabon describe le populos e le territorios que face parte del peninsula italian:
  • Libro V :
    • Capitulo 1 : Le Transpadania e le Cispadania
    • Capitulo 2 : Le Etruria, le Corsica e le Sardinia
    • Capitulo 3 : Le Sabina e le Latio
    • Capitulo 4 : Le Piceno e le Campania
  • Libro VI :
    • Capitulo 1 : Le Lucania e le Bruttium
    • Capitulo 2 : Le Sicilia e le insulas Eolias
    • Capitulo 3 : Le Messapia e le Apulia
    • Capitulo 4 : Causas del potentia roman

Medievo

Per seculos, le description geographic de Strabon non cambiara. Celle que va a cambiar es le su geographia politic.De facto, depost le cadita del Imperio roman de Occidente, e in particular con le arrivata del Longobardos, le Italia ha perdite le su unitate politic. Si a partir del 855 d. C. un nove Regno de Italia (in latino, regnum Italicum) es create, isto comprende solmente le Italia del Nord. In plus, a partir del XII seculo, le Italia es dividite in un myriade de parve Statos in lucta le un con le alteres o victimas del estranieros.
Totevia, Dante Alighieri scribeva in le Divin Comedia (Le Inferno, Canto IX, 114):
“ assi como a Pola, apud le Carnaro, que Italia claude e su terminos bania.»
(Dante Alighieri)
Equalmente, Francesco Petrarca scribeva in le su opra le Cantionier o Rerum vulgarium fragmenta (s.CXLVI, 13-14):
«le belle pais que Appennin divide e le mar e le Alpes cinge.»
(Francesco Petrarca)

Le Resurgemento

Durante le guerras napoleonic, le carta del Italia se trova simplificate, e con nove ideas. Depost le Restauration, le Italia remane secundo le Cancellero Metternich solmente «un expression geographic» sin unitate politic. Totevia, inter le 1848 e le 1860 on ha mittite in movimento un processo que portara al unitate de Italia, usque le proclamation de Vittorio Emanuele II Rege de Italia le 17 martio 1861. Le nove Italia ha un forte nationalismo necessari ab un parte pro reinfortiar al interior le nove stato e ab le altere pro crear se un position inter le grande potentias europee. Le nationalismo sustene que le frontiera natural debe passar super le cresta del Alpes secundo le theorias geographic. Iste frontiera sera consequite depost le victoriose guerra del 1915 – 1918. Assi le Venetia Tridentin, le Venetia Julie con le Istria e parte del Dalmatia, essera unite al Patria italian.