sabato 16 febbraio 2008

ALAIN DE BENOIST
Alain De Benoist
 On presenta ci, extrahente los ex intervistas, pensatas, super varie themas, del maître à penser Alain de Benoist. Obviemente, le textos proponite pote dar solo un pallidissime exemplo del imponente production litterari del Autor francese.

LE BURGESIA
Marx habeva plenmente ration: le burgesia pote esser definite como le classe que ha potite dar se un futuro solo distachante se ab tote le determinationes social e symbolic del passato. Il es assi que illo ha potite collocar in le loco de commando valores economic e mercantil que le societates traditional se habeva sempre prodigate pro diminuer, in le mesme modo con le qual los associava al necessitate, alias al contrario del libertate. Il me sembla que iste evolution entra hodie in conflicto con su limite intrinsec: le systema del moneta perira per le moneta! Le idea que le valor se reduce al precio de mercato, que omne cosa pote esser comprate o vendite, ora es contestate in le ambientes plus differente. Le “mercantilisation del mundo” e le modello anthropologic de un homine qui esserea solo productor e (super toto) consumitor, comencia a esser battite Il resta a saper cosa evenira in futuro in iste lucta propriemente titanic inter le fortias homogeneisante e le fortias “differentialista”. Nos es in un’epocha de transition. Le mundo que nos ha cognoscite es jam collabite, dum nos non pote que interrogar  nos super lo que lo reimplaciara. Le error plus grande esserea analysar le mundo que veni con instrumentos conceptual obsolete. Un cosa sol es secur: le historia es sempre aperte.

DECRESCENTIA
Il esserea errate imaginar le «decrescentia » como un appello a un retorno al passato o a un brutal degradation del nivello de vita. Iste thema ha essite longemente studite per Serge Latouche in su critica al «disveloppamento sustenibile » (que non es altere que un modo de postponer o retardar le expirationes). Ante que un perspectiva economic, cuje implicationes technic non pote esser hic examinate, le « decrescentia» concerne le sphera del mentalitate. Il se tracta de comenciar a facer « decrescer » le idea que le «disveloppamento» del excambios mercantil es un lege natural del vita. Le message que publicitate e medios de communication diffunde continuemente es que le benesser passa per le consumo, o per le appropriation continue de un quantitate sempre major de objectos. Le assimilation de tal message per le conscientias equivale a un ver e proprie colonisation del imagination symbolic, ergo sin problema on pote parlar de un mutation anthropologic (le homine concipite exclusivemente como productor - consumitor). Pro rumper con le primatia del economia, il es necessari apprender e esser habile a dicer, in numerose circumstantias: «il es sufficiente » o «il es bastante » plus tosto que : « sempre plus! »

DEMOCRATIA
Le democratia se funda super le notion de equalitate politic del citatanos, qui possede derectos politic equal quia illes es equalmente citatanos, e non super le notion de libertate, que revela un altere typo de preoccupation. Como ha ben demonstrate Carl Schmitt, le “democratia liberal” non es que, ab iste puncto de vista, un oxymoron, un contradiction in le terminos.
Ma in mi opinion le principal differentia es le sequente. Le democratia liberal es un democratia parlamentar e representative, que se alimenta multo ben con le apathia politic del citatanos, per illo mesme incoragiate. Le die depost un election, como habeva ben observate Rousseau, le citatanos es concretemente private del soveranitate in favor de un classe politic que, hodie, se reduce sempre plus a un oligarchia financiari. Le democratia organic, al contrario, se defini non per le sol recurso technic al suffragio universal, e ancora minus como le regime que consecra le poter del numero, ma como le systema que permitte le plus large participation del citatanos al vita public. Illo se funda super le principio del subsidiaritate, que ha le scopo de regular le maximo possibile del problemas al nivello plus basse, offerente assi al gente le possibilitate de decider illes mesme lo que les concerne. Il se tracta de un procedura permanente, que se exerce a partir del nivello local. Il es ergo al mesme tempore un democratia directe e un democratia de base, fundate super le ligamine social.

EXPORTATION FORTIATE DEL DEMOCRATIA
...le these del neoconservatives american non es melior que cello de Stalin. Illo repropone le mesme hypocrisia. «In le curso de tote lor historia le americanos non ha cessate de pretender que lor sol ambition esseva “defender le libertate”. In nomine del defensa del libertates illes ha sustenite le plus abominabile dictaturas (in Indonesia, in Chile, in Argentina, in Brasil etc.), facite assassinar un multitude de chefes de stato democraticamente eligite, qui displaceva a illes, e dispergite sur le integre planeta un ideologia mortifere que ha portate con se ubique le eradication del specificitates cultural e del identitates popular. Iste modo de pensar es de facto conforme al ideologia liberal, que pretende anque illo de haber le monopolio del “libertate”, ma que, historicamente, ha ite con le spoliation del laboratores, le legitimation del imperialismo colonial e le mercantilisation systematic del relationes social. Le exportation del “democratia” e del “derectos del homine” (on diceva in altere tempores: del “civilisation” e del “progresso”) cela regularmente  scopos multo minus nobile, que non se funda tanto super valores ma, al contrario super le interesses.

IMMIGRATION ISLAMIC IN EUROPA
...le immigration es ineluctabile. Totevia il es necessari reducer lo e restringer lo comocunque, e isto on pote facer lo solo cooperante activemente con le paises de origine. Le unic modo de affrontar le immigration islamic es non practicar alicun assimilation. Il es necessari que illes vive in communitates lor, homogenee a lor interior. Io pensa que il non ha un periculo islamic; o melio que non es illo le principal. Le identitate europee es multo plus menaciate per le logica del capitalismo que per le Islam. De facto le multinationales american controla le politicas economic, le paises islamic no. Io vide cata die films american, libros, jornales, musica, vestimentos, modos de dicer e de pensar. Io non vide alicun film islamic, alicun stilo de vita islamic presente 24 horas al die in television. Le un es un periculo possibile, le altere es in acto. Le mercatos financiari incide super nostre vita cata die in plus in tote le mundo. E illes non es islamic.

PAGANISMO
Mitrha
Multe traditiones popular ascende al paganismo, ma anque le christianismo ha contribuite a lor formation. Le festa de Natal, pro citar un, es in origine le grande festa del solstitio de hiberno – le momento in le qual, in le corde del nocte, le homines affirma lor fiducia in le proxime retorno del Sol – sed es anque, obviemente, le data que le Ecclesia ha (tardivemente) fixate pro commemorar le nascentia de Jesus. Il es de altere latere ben cognoscite que, in occasion del evangelisation de Europa, le christianismo ha reprendite pro su conto numerose elementos traditional proveniente ab le paganismo, dante a illos simplicemente un altere portata o un altere significato. Le Medievo ha essite le periodo privilegiate de iste syncretismo. Pro me, le paganismo es un thema plenmente actual, quia nos es, volente o non volente, le heredes de illo. Ma il non besonia dar de illo un representation, io non dicerea “folkloristic” (le folklore es eminentemente respectabile), ma caricatural o sectari. Io non ha le minime sympathia pro le major parte del parve gruppos neopagan, cuje activitates me sembla reentrar, como le moda del New Age, in le campo del “secunde religiositate” que pro Spengler constitueva un del tractos characteristic del modernitate. Le passato pagan non retornara, ma nos pote sempre trovar beneficio referente nos a alicun de su valores o de su representationes symbolic.  Io parlara hic non sur le retorno, sed sur le recurso al paganismo. E io recordara  anque que paganismo non es solo le traditiones popular, sed toto lo que a nos veni desde le Antiquitate. Le paganismo es anque Aristotele, Homero e le imperio roman!

LE RADICES DE EUROPA
Le recente debatto super le “radices christian” de Europa esseva (...) completemente falsate. Parlar re “radices” remanda necessarimente al origines. Ergo, al origines Europa non esseva christian, ma pagan: quando le christianismo ha nascite, le civilitate europee habeva jam retro se multe millennios de existentia. Naturalmente, le christianismo ha pois representate un elemento constitutive del historia de Europa del qual io es le ultime a subvalutar le importantia. Ma le historia e le origine es cosas differente. De altere parte, le christianismo non ha forsan mesme se origines heterogenee?

LE TRADITIONES
Le traditiones non es eterne. Totes ha un initio, e multe de illes ha habite o habera un fin. Il es importante recordar lo, quia nos ha un natural tendentia a opponer “tradition” e “novitate”. Ma, tote le traditiones esseva, al initio, novitates! Ma il non se ha tractate de innovationes radical, nascite per le libere voluntates del homines. Il besonia plus tosto imaginar lor establir se como le resultato de un lente sedimentation in le qual le modo di vita, le circumstantias historic, le transformationes del viver-insimul, e anque, obviemente, le inconsciente del populos, ha explicate un rolo de prime plano. Per isto il non besonia reinviar systematicamente le traditiones al passato. Il ha un modo de voler “mantener vive” le traditiones que los transforma in un spectaculo a consumer inter le alteres, lo que cancella a illos omne interesse. Que nos non oblida anque que, quando le traditiones popular esseva vive e active, illos non esseva considerate como tales, ma plus tosto como un cornice quasi natural que rhythmava le existentia historic-social. Desde le momento in le qual on pote objectivar le notion mesme de tradition, iste ultime es jam menaciate. On poterea dicer le mesme cosa del identitate: illo deveni un problema solo quando nos lo ha jam perdite (o va perder lo). (...) il non es possibile crear traditiones in le senso del voluntarismo rational, ma es perfectemente possibile establir certe conditiones de existentia collective que permitterea a nove traditiones de apparer. Le retrovate importantia del communitates e le renascentia del localismo poterea ir in iste direction.

LE TRANSMISSION DEL TRADITIONES
Le transmission es directemente menaciate in un mundo in le qual, le futuro non inspirante plus sperantias (ma nutriente plus tosto angustias) e le passato essente hodie sempre plus oblidate,  nostre contemporaneos tende a viver  in le ephemere de un perpetue presente. Le acceleration del innovationes technologic aggrava ulteriormente le situation, in le mensura in le qual le experientia del vetere generationes es sempre minus transmissibile al noves, quia omne generation cresce ora in un universo que le precedente non ha cognoscite. Isto non subtrahe al necessitate de reager contra iste tendentia, effortiante se de transmitter non solo le saper, ma anque le attitudes mental. Reprendente le expression de Serge Latouche, le objectivo es “decolonisar le imagination”. On pote facer lo solo rehabilitante le pensamento critic, le qual presuppone jam un curiositate del qual le juvenes de hodie, attrahite per le modas del momento, solo rarmente da proba.

(traduction per S. Leucio)