sabato 18 agosto 2007

Colonisation del Nove Anglaterra 

Alexis de Tocqueville

Extracto de: DEL DEMOCRATIA IN AMERICA
Traducite del texto original francese per Erich Berger
IL ES IN LE COLONIAS ANGLESE DEL NORD, MELIO COGNOSCITE sub le nomine de Statos del Nove Anglaterra, que se ha combinate le duo o tres ideas principal que forma le base del theoria social del Statos Unite.
Le principios del Nove Anglaterra se ha in le comenciamento expandite in le statos vicin; postea illos ha ganiate pauc a pauc le plus distantes, e finalmente, si il es permissibile exprimer se assi, illos ha 'penetrate' le confederation integre. Ultra le limites de isto, illos influentia nunc tote le mundo american. Le civilisation del Nove Anglaterra ha essite como iste focos incendite super le summitates, que, post haber expandite lor calor circa se mesme, tinge ancora de lor claritate le ultime confinios del horizonte. Le fundation del Nove Anglaterra ha offerite un nove spectaculo; toto esseva ibi singular e original. Quasi omne colonias ha habite como prime habitantes homines sin education e sin ressources, que le miseria e le misconducta pulsava foris del pais que les habeva vidite nascer, o speculatores avide e interprenditores industrial. Il ha colonias que non pote reclamar mesmo un tal origine. San Domingo ha essite fundate per piratas, e in nostre tempore le cortes de Anglaterra se carga de popular Australia. Le emigrantes qui veniva establir se super le costas del Nove Anglaterra, pertineva omnes al classes opulente de lor patria matre. Lor reunion super le solo american presentava ab le origines le phenomeno singular de un societate ubi se trovava ni grande seniores ni plebe, e, pro assi dicer, ni povros ni riccos. Il habeva, proportionalmente, un plus grande massa de lumine expandite inter iste homines que intra alicun nation europee de nostre dies. Omnes, forsan sin exceptar un sol, habeva recipite un education assatis avantiate, e alicunos inter illes habeva facite cognoscer se in Europa per lor talentos e lor scientia. Le altere colonias habeva essite fundate per aventureros sin familias; le emigrantes del Nove Anglaterra apportava con illes admirabile elementos de ordine e de moralitate; illes vadeva al deserto accompaniate de lor uxores e infantes. Sed lo que les distingueva super toto de omne alteros esseva le objecto de lor interprisa. Il non esseva le necessitate que les fortiava abandonar lor pais. Illes lassava ibi un invidiabile position social e medios pecuniari assecurate. Non plus vadeva illes al nove mundo pro ameliorar lor situation e accrescer lor ricchessas. Illes se rapeva del dulcor de lor patria pro obedir a un necessitate purmente intellectual; exponente se al miserias inevitabile del exilio, illes voleva facer triumphar un ideaLe emigrantes, o como illes mesme si ben se appellava, le peregrinos ('pilgrims'), pertineva a ille secta del Anglaterra, a que le austeritate de su mores habeva facite dar le nomine de puritan. Le puritanismo non esseva solmente un doctrina religiose; illo se confundeva etiam in alicun punctos con le plus absolute theorias democratic e republican. De illac illo habeva su adversarios le plus periculose. Persequite per le governamento del patria matre, ferite in le rigor de lor principios per le progression quotidian del societate in le medio del qual illes viveva, le puritanos cercava un terra que esserea tanto barbare e tanto abandonate per le mundo que ibi il esserea ancora permittite a uno viver de su maniera e precar Deo in libertate. Le passiones religiose e politic, que lacerava le imperio britannic durante tote le regno de Carolo Primo, pulsava omne anno nove greges de sectarios super le costas de America. In Anglaterra le foco del puritanismo continuava trovar se locate in le classes medie. Il es de intra le classes medie que sortiva le majoritate del emigrantes. Le population del Nove Anglaterra se accresceva rapidemente e durante que le hierarchia del rangos classificava le homines in le patria matre ancora de maniera despotic, le colonia presentava de plus in plus le nove spectaculo de un societate homogenee in omne su partes. Le democratia, tal que le antiquitate non habeva osate soniar lo, exiva toto grande e toto armate del medio del vetule societate feudal. Contente de remover a longe de se germines de perturbation e elementos de nove revolutiones, le governamento anglese videva iste numerose emigration sin regrettar lo. Illo lo favorisava mesmo al limites de su poter e pareva a pena occupar se del destino de illes qui veniva super le solo american a cercar un asylo contra le duressa de su leges. On poterea dicer que illo reguardava le Nove Anglaterra como un region livrate al sonios del imagination, un region que on debeva abandonar al libere essayos del innovatores. Le colonias anglese – e isto esseva un del causas principal de lor prosperitate – ha semper gaudite de plus libertate interior e de plus independentia politic que le colonias del altere populos. Sed in nulle parte iste principio de libertate esseva applicate plus completemente que in le Statos del Nove Anglaterra.
–––––
Le civilisation anglo-american es le producto de duo elementos perfectemente distincte que alibi se ha frequentemente facite guerra, sed que in America on ha succedite a incorporar de alicun maniera le un in le altere e a combinar miraculosemente. Io vole parlar del spirito de religion e del spirito de libertate.

sabato 4 agosto 2007

Ode al Gaudio

De Wikipedia, le encyclopedia libere

Ode an die Freude (Ode al gaudio) es un poema scribite per le poeta e historico german Friedrich Schiller. Ille scribeva le version original del poema in 1785. In 1803ille lo adaptava alquanto. Le poema ha ganiate cognoscentia special per su uso in le final de choro del None Symphonia de Beethoven ex 1823. Beethoven addeva pro iste occasion tres regulas al initio del poema.
Durante le Jocos Olympic de 19561960 e 1964, le interpretation de Beethoven jam se jocava como hymno national pro le Equipa unificate de Germania, e in 1972 le Consilio de Europa seligeva le ode como hymno national. In 1985 le capites de stato e chefes de governamento del Union Europee seligeva lo como hymno del Union Europee official.
                  (trad. M. Menna)

                           *  

Gaudio, fulgor de beltate,    Freude, schöner Götterfunken, 
Filia ex Elyseo,              Tochter aus Elysium, 
Nos ingrede infocate,         Wir betreten feuertrunken, 
Diva, in tu sanctuario!       Himmlische, dein Heiligtum! 
Jam religa tu magia           Deine Zauber binden wieder, 
Lo que dividite sta;          Was die Mode streng geteilt; 
Homines in harmonia           Alle Menschen werden Brüder, 
Sub tu ala suave va.          Wo dein sanfter Flügel weilt. 
 
                           *  
Qui le summe ben gustava      Wem der grosse Wurf gelungen, 
Del amicitate ver,            Eines Freundes Freund zu sein, 
Qui dulce sposa trovava,      Wer ein holdes Weib errungen, 
Adjunge se, vamos gauder!     Mische seinen Jubel ein! 
Si, anque qui ha ganiate      Ja, wer auch nur eine Seele 
In le mundo un corde sol!     Sein nennt auf dem Erdenrund! 
Qui jammais, vos, lacrimate,  Und wer's nie gekonnt, der stehle 
E fugite iste sol.            weinend sich aus diesem Bund. 
 
                           * 
Bibe gaudio omne seres        Freude trinken alle Wesen 
Ab le sinos natural;          An den Brüsten der Natur; 
Bones tote, tote males        Alle Guten, alle Bösen 
Seque su sentier floral.      Folgen ihrer Rosenspur. 
Vino, basios passionate,      Küsse gab sie uns und Reben, 
Un loyal amico da;            Einen Freund, geprüft im Tod; 
Anque l' verme ha voluptate,  Wollust ward dem Wurm gegeben, 
Cherub ante Deo sta!          Und der Cherub steht vor Gott!

Le introduction de iste articulo ha essite traducite ex nederlandese ab nl:Ode an die Freude.